بسمِ الله الرحمن الرحيم والصلاة والسلام على سيدنا محمد خاتم الأنبياء والمرسلين، اللهم اهدنا وتُب علينا من المعاصي ونقنا من الخطايا كما ينقى الثوب الأبيض من الدنس أما بعد
أنا بقالي فترة عاوز أكتب البوست ده وأحكي تجربتي يمكن أفيد حد والناس تعرف ان أيوا تقدر تبطل وتتوب مش لازم تستنى أما تتجوز (حجة فارغة مع احترامي لإن فيه متجوزين بيفضلوا مدمنين برضو) وهتستفيد ايه لما تبطل وإن الوقت مفاتش خلاص فانا قررت اني أبطل فترة وأشوف هل هتحس بتغير؟ وايه أحسن طريقة تبطل بيها؟
أنا عندي ٢٣ سنة اكتشفت الإباحية والعادة وأنا عندي حوالي ١٣ سنة لإني كنت بحب الكمبيوتر وبقضي عليه وقت طويل فكانت مسألة وقت إني أتعرض للمحتوى ده فالأول مكنتش فاهم ايه الي بعمله بس زي أي حد كنت مبسوط، مع الوقت الموضوع بدأ يأثر عليا زي اني اسهر ومنامش كويس وأقعد لوحدي واكروت مذاكرتي وتفكيري بقى جنسي تجاه البنات ودي بقيت متعتي اني أعزل نفسي مع الشاشات وامارس العادة (لما بفكر اني ضيعت فترة من عمري كدا ببقى نفسي أرجع وأساعدني) لما عرفت برضو إن أصحابي بيعملوا نفس الحاجة وبيكلموا عنها عادي وشوفت ميمز عليها حسيت إنه كله مضطر يعملها وفضلت مكمل بس عارف إن ده مش صح
لما كبرت شوية بدأت أفهم ليه العادة والإباحية بيسببوا إدمان وصعب حد يبطلهم عشان أهم سببين: 1-بيخرجوا مادة الدوبامين وده ناقل عصبي بيدي شعور جميل بالمكافأة والسعادة بيطلع بعد إي إنجاز الشخص بيعمله زي إنك تنجح في امتحان صعب، تقبض المرتب، او حتى حاجة بسيطة خالص زي أكلة حلوة أو خروجة مع أصحابك وكمان الناقل العصبي ده مسؤول عن حاجة مهمة جداً وهي الشغف أو الرغبة خليني أحكيلكم تجربة لما جابوا فار تجارب جعان وقللوا الدوبامين في مخه وحطوه في قفص وقدامه زرار لما يدوس عليه يديله أكل كان بياكل كمية أقل جداً من احتياجه لدرجة إنه مات من الجوع وده برضو أحد أسباب إن التيك توك والريلز والإباحية بيخلوا معندكش طاقة وشغف تعمل حاجة بعدهم لإنهم بيستنفذوا مخازن الدوبامين في مخك فبتحتاج تستنى تاني يوم لحد ما تتملي تاني عشان ترجع تخلصها في نفس الحاجات تاني وتكمل الدايرة وهكذا
السبب التاني 2-وده معقد شوية وفهمته مؤخراً وهو إن كل ما تحصلك ظروف سيئة زي مشكلة كبيرة تعصبك، حاجة جامدة توترك زي امتحانات او مسؤوليات كبيرة إنت شايلها، أهلك شداد عليك، البنت الي بتكلمها سابتك، عملت انجاز كبير وعاوز تحتفل..... كل المؤثرات دي بتوترك نفسياً وإنت مبتعرفش تتعامل مع إحساس التوتر ده فالمخ بيحاول يساعدك عن طريق إنه يدور على مصدر دوبامين سريع لإن ده بتاع السعادة والراحة فممكن بقى يقولك اسمع أغاني، خد لفة في التيك توك او الأسوأ بقى مارس العادة عشان "ترتاح" بس طبعاً الدوبامين بيعلى بسرعة وبيقل بسرعة فإنت بتحس بشعور وحش جداً وهو الندم وترجع تفتكر المشكلة الي كانت مضايقاك وتتوتر أكتر فالعادة حرفياً عاملة زي واحد جعان أوي وقدامه أكل كتير ومهما ياكل مبيشبعش بل بالعكس بيجوع أكتر ويتعب...
*العادات الصحية والإنجازات الصعبة الدوبامين بيعلى فيها بالراحة ولما بيرجع لمعدله الطبيعي تاني بياخد وقت عكس اي متعة سريعة بيطلع بسرعة ويقع جامد يمكن حتى أقل من المعدل الطبيعي(Easy come easy go)
*طرق العلاج في رأيي:
كتير حاول إنه يبطل مرة واحدة ويمسح كل حاجة بس بيجي بعد أسبوع او أسبوعين بالكتير وبيرجع أسوأ من الأول وده شىء طبيعي لإن مخك خلاص اتعود على نسبة عالية من الدوبامين وفيه مسارات عصبية اتكونت في المخ من سنين انك لازم كل اسبوع تمارس العادة فإنك تبطل مرة واحدة بيعمل صدمة وبيخليك ترجع بشراهة
الحل الي نفع معايا إنك تبطل تدريجي بجدول يعني ايه؟ لما تاخد القرار مع نفسك إنك ناوي تبطل فعلاً هتختار يومين في الأسبوع بعاد عن بعض وهتمارس فيهم العادة إجباري (فيه شروط هقولها تحت) وهتعمل كدا لمدة ٣ أسابيع لحد ما مخك يتعود إن ده الطبيعي دلوقتي وبعدها هتخليها مرة واحدة في الأسبوع واختار يوم برضو وخليك كدا شهر مش مسموحلك غير يوم فقط لحد برضو ما مخك يتعود وبعد الشهر لما تحس انك مرتاح ومش محتاج تمارس العادة امتنع خلاص نهائي ساعتها إنت مش هتبقى محتاج العادة لإنك بطلت تدريجي ومستوى الدوبامين في مخك هيكون انتظم (أنا كنت بسجل في نتيجة الموبايل هتلاقوها في الصورة التانية)
•شروط مهمة لازم تتبعها :
-غُض البصر عن أي حاجة ممكن تثير شهوتك ودي الحاجة الي ساعدتني جداً.
-متستخدمش تيك توك إنستا وإنت لوحدك أو بالليل عشان نفس السبب وياريت أحسن لو تمسحهم أنا عامل كدا بقالي سنتين.
-طبيعي إنك تبقى شهواني جداً أول فترة فلازم تقاوم عشان مصلحتك.
-طبيعي برضو تحس إنك قاطع مياه ونور بعد فترة ودي حاجة كويسة جداً ودليل إن مخك بدأ يبرمج نفسه تاني ويقطع مسارات العادة الي اتكونت بقالها زمن فمتخافش هترجع بعد فترة أحسن من الأول صدقني.
-امسح أى محتوى إنت مخزنه عندك او أى حاجه ممكن تثيرك زي اكاونتات او بيدجات على أى برنامج بتستخمه من الآخر غض البصر سلاحك.
-شعورك بالغضب/التوتر/القلق/الفرحة لازم تتعامل معاه بعقلانية ومتهربش منه، لازم تهدى وتعرف إن كل حاجة ليها حل بإذن الله وتاخد بأسباب أي مشكلة تواجهك ومتلجأش لحل سريع يريحك زي السجاير/العادة.
-حاول تشغل وقتك بحاجات مفيدة أو حتى استكشف هوايات جديدة عشان مخك ينشغل عن التفكير في العادة.
انا استفدت ايه لما بطلت ٤ شهور بقى ؟
-الوقت الي كان بيضيع في الإباحية والعادة بقيت بستثمره في المذاكرة وجيبت أعلى مجموع ليا الترم الي فات في الكلية وانتظمت في الصلاة وبالي بقى مرتاح من شعور الذنب واني ممكن أموت على معصية زي دي.
-بقيت بنام كويس وتركيزي اتحسن شوية ومودي بقى أحسن بقيت متفائل أكتر وعاوز أنجح وأعمل حاجات جديدة عكس الأول كنت طول الوقت كئيب ومبضون وخلقي ضيق.
-ثقتي في نفسي زادت شوية وده مش هزار والله بقيت أتكلم أكتر مع الناس أكتر وبتخانق لو حد جه عليا.
الحاجات البسيطة بقيت ممتعة زي اني أخرج شوية مع- اصحابي أو أشوف فيلم او أزور عيلتي، رجعت برضو للجيمنج شوية لإني كنت بزهق بسرعة.
-بقى عندي ثقة أكتر مع البنات خصوصاً اني بطلت اشوفهم بنظرة جنسية زي الأول فبقيت بتعامل عادي لدرجة اني كنت هتخانق مع واحدة في الكلية من كام يوم وحاجة أخيرة بيني وبينكم هتلاحظوا فرق في قوة الانتصاب 🍆...
فالصراحة أنا شايف إن أه لازم نبطل والفوايد تستاهل خصوصاً إنك هترحم البلبل شوية لإنك اتعودت ان النشوة بتاعتك عبارة عن شاشة وإيد فلما تيجي تتجوز مخك هيكون بقاله سنين متعود عالطريقة دي فهيقولك فين الفيلم والايد وهتلاقي نفسك عطلان من أولها فيعني لو مش عاوز تبطل عشان نفسك بطل عشان مراتك تستاهل تتجوز راجل سليم وزي ما إنت عاوزها من غير عيوب إبدأ بنفسك وحتى لو متجوزتش برضو فأنت أولى بوقتك تعمل فيه حاجة تفيد مستقبلك ومتبقاش عبد لشهوتك هي الي بتوديك وتجيبك ومتكنش سبب في دخولك النار
بطَّل انهارده عشان في المستقبل تشكر نفسك على اليوم ده ومتندمش على باقي الايام الي عمال تضيعتها ولو واحد بس قرر انه يبطل ويساعد نفسه و قدر ينجح أنا هكون سعيد جداً وشكراً لكل واحد قرأ كلامي ووصل هنا ❤